Hjólað í vinnuna

Keppnin stendur frá 9. - 29. maí 2012 að báðum dögum meðtöldum

Það er einlæg von þeirra sem standa að Hjólað í vinnuna að verkefnið ýti við sem flestum af stað í reglulega hreyfingu og hvetji fólk til að taka upp virkan ferðamáta. Reglurnar eru fáar og einfaldar.

Hverjir eru gjaldgengir þátttakendur?

Allir geta tekið þátt í Hjólað í vinnuna svo framarlega sem þeir nýta eigin orku til að koma sér til og frá vinnu þ.e. hjóla, skokka, ganga, nota línuskauta o.s.frv. Þeir sem nýta almenningssamgöngur geta einnig tekið þátt en þá er skráð sú vegalengd sem gengin eða hjóluð er til og frá stoppistöð.

Eftirfarandi regla er sett inn til að koma til móts við einstaklinga sem búa í öðru sveitarfélagi en þeir starfa og hafa ekki aðgang að almenningssamgöngum.

Þeir geta notast við einkabíl hluta af leiðinni en þá þurfa þeir einstaklingar að ganga minnst 1,5 km (~15 mín) eða hjóla minnst 3 km (~15 mín) hvora leið og uppfylla þannig ráðleggingar embætti landæknis um daglega hreyfingu.

Fjöldi daga

Hver þátttakandi má aðeins skrá 13 daga (þá hvaða 13 daga sem er). Þetta er gert til þess að jafnaleikinn milli vaktavinnufólks og annarra.

Hvaða starfsmannafjölda á að skrá?

Skrá á þann starfsmannafjölda sem launadeild viðkomandi vinnustaðar hefur á launaskrá þegar keppni hefst.

Ef einhverjir starfsmenn eru í orlofi eða námsleyfi má draga þann fjölda frá.
Ef margir einstaklingar eru í hlutastarfi og mæta ekki í vinnu daglega (13 daga á meðan á átakinu stendur) má sameina tvo starfsmenn sem uppfylla 100% starfshlutfall í einn.
Þeir starfsmenn sem eru í hlutastarfi en mæta daglega til vinnu skal skrá sem einn starfsmann þar sem viðkomandi starfsmaður mætir daglega til vinnu.

Ath. að þar sem keppt er um flesta daga hlutfallslega miðað við heildarfjölda starfsmanna á vinnustaðnum er mjög mikilvægt að skráður sér inn heildarfjöldi starfsmanna á vinnustaðnum (eða þeirrar einingar sem miðað er við). Það er ekki rétt að skrá einungis fjölda þeirra starfsmanna sem taka þátt í leiknum. Eðlilegt er að nafn liðsins endurspegli þann hóp sem að baki því stendur.

Hvað má skrá?

Gjaldgengir þátttakendur mega skrá eftirfarandi ferðir:

í og úr vinnu
allar vinnutengdar ferðir á vinnutíma þ.e. á fundi og sendiferðir sem annars hefðu verið farnar á bíl að því gefnu að viðkomandi hafi nýtt sér virkan ferðamáta til vinnu.

Hvað má ekki skrá?

Meginmarkmið Hjólað í vinnuna er að hafa áhrif á ferðavenjur fólks. Þó svo að eftirfarandi leiðir séu frábærar til hreyfingar í daglegu lífi samræmast þær ekki meginmarkmiðum verkefnisins. Því má ekki skrá:

heilsubótarhreyfinu í hádeginu, göngu eða hjólreiðatúr
ef farið er út að hjóla eftir að heim er komið úr vinnu
ef starfsmenn nota hjól eða göngu til að koma sér á mill staða innan vinnustaðar.

Keppnisgreinarnar eru tvær

Vinnustaðakeppni þar sem keppt er um flesta þátttökudaga (hlutfallslega m.v. fjölda starfsmanna á vinnustaðnum).
Kílómetrakeppni þar sem keppt er á milli liða um annars vegar flesta kílómetra og hins vegar hlutfall kílómetra m.v. fjölda liðsmanna í liðinu.

Í vinnustaðakeppninni er keppt í 7 flokkum eftir fjölda starfsmanna á vinnustaðnum og skrást öll lið sjálfkrafa í þessa keppni

3-9 starfsmenn
10-29 starfsmenn
30-69 starfsmenn
70-149 starfsmenn
150-399 starfsmenn
400-799 starfsmenn
800 o.fl. starfsmenn

Í kílómetrakeppninni er einungis keppt í einum flokki og er valfrjálst fyrir lið að skrá sig í þessa keppni

Til þess að skrá sig í kílómetrakeppnina þarf að haka við í í reitinn "já, við tökum þátt í kílómetrakeppninni" þegar lið er skráð til leiks. Athugið að einnig er hægt að skrá sig í kílómetrakeppnina eftir að lið hefur skráð sig til leiks ef liðsmenn hafa ekki tekið ákvörðun um þátttöku þegar liðið er skráð til leiks. Lágmarksfjöldi í liði í liðakeppninni er 3 og hámarksfjöldi 10.

Liðsstjóri - Fjöldi liðsmanna í hverju liði

Í hverju liði er liðsstjóri sem sér um að skrá lið sitt til þátttöku og hann heldur einnig utan um daglega skráningu á netinu. Miðað er við að hvert lið samanstandi af 1-10 liðsmönnum.

Sami vinnustaður, mörg lið - Kennitalan stýrir hvaða lið telja sameiginlega

Ef fleiri en 10 hjóla á sama vinnustað er einfalt að stofna lið númer tvö, þrjú o.fl.....undir kennitölu fyrirtækisins. Þannig telur árangur liðanna sameiginlega fyrir vinnustaðinn. Það er tilvalið að skipta vinnustaðnum upp, t.d. miða við deildir á sjúkrahúsi eða útibú í bönkum. Á vefnum er auðvelt að fylgjast með árangri mismunandi liða innan vinnustaðar (með því að smella á nafn vinnustaðarins) og því lítið mál að búa til innanhúskeppni samhliða. Athugið að margir vinnustaðir t.d. innan sveitarfélaga hafa sömu kennitölu og sveitarfélagið. Ef viðkomandi vinnustaður vill keppa undir sínum merkjum er mikilvægt að notast sé við aðra kennitölu en sveitarfélagsins (t.d. kennitölu eins starfsmanns).

Til vinnustaða með starfsstöðvar í fleiru en einu sveitarfélagi:

Nú geta vinnustaðir með starfsstöðvar í fleiri en einu sveitarfélagi keppt saman undir einum vinnustað ásamt því að hver og ein starfsstöð getur keppt sem sér vinnustaður innan síns sveitarfélags. Vinsamlegast kynnið ykkur þetta nýja fyrirkomulag hér.

Skráning á vegalengd

Hver þátttakandi má aðeins skrá 13 daga (þá hvaða 13 daga sem er). Þetta er gert til þess að jafna leikinn milli vaktavinnufólks og annarra. Heimilt er að skrá þá vegalend sem farin er allt frá því að lagt er úr hlaði til vinnu, þangað til heim er komið í lok vinnudags. Skrá skal þá vegalengd sem farin er á milli staða en ekki innan vinnustaðar.

Öryggið í fyrirrúmi

Hver þátttakandi ber ábyrgð á sínu öryggi. Við hvetjum hjólagarpa og línuskautafólk til að nota hjálma og aðrar varnir og að sjálfsögðu að fara eftir umferðarlögum og taka tillit til annarra vegfarenda.